Sena MLA helten MLA an nihna aṭanga ban tumna court-ah khing let

Maharashtra-a rorellai, Shiv Sena MLA helte chuan Assembly member an nihna aṭanga disqualify tir an tumna chu Supreme Court-ah an khing.

MLA hel hruaitu, Eknath Shinde chuan Supreme Court-ah hian chief minister Uddhav Thackeray-a'n amah leh MLA dang 15-te disqualify tir a tumna chu khingin, Assembly deputy speaker Narahari Zirwal-a'n rin tawk lohna motion hnawlsak an nihna pawh an khing let bawk.

Supreme Court-a petition an thehluhah hian, CM-in MLA helte disqualify tura ngenna a thehluh chungchangah, Deputy Speaker chu thlak a nih hma thutlukna siam lo tura ngenna an siam tel a ni. Shinde kaihhruai Shiv Sena MLA hel 36-te hian Deputy Speaker laka no-confidence motion an thehluhah hian hming an ziak a ni.

Hetih lai hian senior advocate Devdutt Kamat chuan Assembly Speaker an neih loh avangin, Deputy Speaker hian thutlukna siam turin thuneihna a neih thu a sawi.

Mumbai-a tualchhung mi eng emaw zat chuan Eknath Shinde leh a lamṭang Shiv Sena MLA-te chu an state-a politics buaina nasa tak siamah puhin, Bombay High Court-ah PIL an thehlut a, Assam-a inkhuar mek MLA helte chu an state-a kir nghal tur leh, an hnate thawk chhunzawm tura hriattir turin court hi an ngen.