CM-te’n Kashmir mite himna an ngai pawimawh tur a ni : Rajnath Singh

Union Home Minister Rajnath Singh chuan state tin chief minister-te chu Kashmir mite himna ngai pawimawh turin a ti.

Nilaini khan Rajasthan-a Chittorgarh-ah Kashmir aṭanga kal zirlai pakhat chu kutthlak a ni a, Uttar Pradesh-ah pawh Kashmir zirlai beih an ni bawk. Home Minister chua Kashmir zirlaite beih an ni chu a dem thu sawiin, state hrang hranga Kashmir awmte himna chu ngaih pawimawh a ṭul a ni, a ti.

Rajnath Singh chuan, “State tina chief minister-te chu Kashmir miten beih an tawh lohna tura hma la turin ka ngen a, India khua leh tui dik tak an ni a, India ram himna tur pawhin an tha an thawh nasa hle a ni”, a ti. Home Secretary hnenah pawh ngenna siam tur hian a hrilh tawh thu a sawi bawk.

Singh chuan ṭhalaite hnenah Kashmir mite chu an unau, India khua leh tui dik tak an nih anga en tur te, chhungkaw zinga mi an nih anga enhrang lo tura a duh thu a sawi.

Nilaini zing khan Chittorgarh, Mewar University-a Kashmir zirlai paruk chu tualchhung miten kut thlakin zirlaite hian hliam an tuar a, damdawi-inah hruai an ni. Heng zirlaite hi bazar-ah chawhmeh lei tura an kal chu mi panga velin lo tidingin an hming leh khawi state nge an nih an lo zat a ni. Heng mite hian Kashmir aṭanga kal an nih thu an sawi hnuah kut an thlak zui ta niin, police officer Dinesh Kumar chuan a sawi a, pawikhawihtute hi man an la ni lo.

Mewar University-ah hian Kahsmir zirlai 500 dawn an awm a, an zinga 300 vel chu Jammu bial aṭang kal an ni. Nikum khan he university-ah vek hian Kashmir zirlai ṭhenkhat chuan hostel room-ah bawngsa an siam nia puhin kut thlak an lo ni tawh bawk.