Nepal hnenah Everest tlang tehṭhat dil

India chuan Nepal sorkar hnenah khawvela tlang sang ber, Everest tlang chu India scientist team tehṭhat tir turin a dil.

Nepal foreign ministery official chuan India dilna hi an hmuh tawh thu leh, an ngaihtuah mek thu a sawi.

India ngenna hi phalsak a nih chuan Everest tlang hi Asia-a scientific institute upa ber, Survey of India team-in an teh dawn a, he hna thawk tur hian scientist leh tlang tlawn mi 30-te buatsaih mek an ni. He project atan hian cheng vaibelchhe 5 vel sen rin a ni a, programmme kaihruaitu Surveyor General of India Dr Swarna Subba Rao chuan kar ruk chhunga an zawh hman a rin thu a sawi.

Everest tlang sang zawng chungchangah hian inhnialna tam tak a la awm reng a, official-a chhinchhiah danah chuan metere 8848 (feet 29,029)-a sang a ni. Tlang san zawng teh hnuhnun ber chu kum 1956-a Survey of India-in a teh kha a ni.

Tlang sang zawng chungchangah hian Nepal leh China-te chu an inrem lo a, China chuan a sang zawng hi chhinchhiah dan ai hian a hniam niin a ngai. Hei vang hian Nepal sorkar buaina chinfel nana teh ṭhat leh hi India chuan a duh a ni. Kum 2015-a Nepal rama lirnghing na tak a thlen hnu khan, satellite picture aṭanga a lan danin Everest tlang hi a hniam phah deuh nia sawi a ni a, mahse hei hi scientist-te chuan an pawm lo thung.