EC-in kum hnih chhungin VVPAT nuai 16 lei tum

Election Commission chuan kum 2019 Lok Sabha inthlanpui neih huna polling station tinah, voter verifiable paper audit trail (VVPAT) khawl hman tel a nih theih nan kum hnih chhungin VVPAT khawl nuai 16 lei a tum.

Commission hian Union cabinet-in VVPAT 16,15,000 leina tura a rawtna a pawmsak hnuah, a siamtu ECIL leh BEL hnenah hriat­tirna hi a pe nghal a, heng khawl leina atan hian cheng vaibelchhe 3,173.47 a seng dawn a ni.

VVPAT 8,07,500 chu nakkum September thla khian manufacturer pahnih hnen aṭang hian lakfel hman tum a ni.

Chief Election Commissioner Nasim Zaidi chuan VVPAT hman a pawimawhna sawiin, hemi hmang hian langtlang inthlan neih a ni thei dawn a, voter-te chuan an party leh candidate vote chu a dik ngei em tih an hre thei dawn bawk a, inthlan kalphung a thianghlimin a felfai tawk tih rinna an nei ngam dawn a ni, a ti.

Eptu party BSP, AAP leh Congress chuan tunhnaia inthlan buatsaihah vote thlakna, electoral voting machine (EVM) chu khawih chingpen nia sawiin na takin an sawisel a, epty pawl 16-te inthlan felfai leh thianghlim, langtlang zawk a awm theih nan paper ballot hman leh rawtin EC-ah petition an thehlut tawh bawk.