Tamil CM-in loneitu nawrh huaihawtte a hmu

Tamil Nadu Chief Minister K. Palaniswami chuan nimin khan an state-a loneitu nawrh huaihawtte chu New Delhi-a Jantar Mantar-ah a hmu a, a theih anga puih a tiam.

Tamil Nadu-a loneitute hi ni 40 kalta chhung khan New Delhi-ah an nuar tawh a, loan leiba an neih ngaihdam tur te, khawkheng vanga harsatna tawkte chhawmdawlna pekte, an harsatna tawh mek ching­fel tura Cauvery management board din te an phut a ni.

Palaniswami-a hian loneitute hi minute 20 chhung meeting a neih pui a, an harsatna tawh leh an thil phutte chu Prime Minister Narendra Modi-a hnena thlen sak a tiam.

Nawrh huaihawttu, National-South Indian Rivers Linking Farmers Association president P.Ayyakannu chuan an thil phut chu a hlawhtlin hma chuan an nuar chhunzawm zel dawn tih a sawi.

Loneitute hian ni 40 chhung chu Prime Minister office kawtah nawrh an lo huaihawt tawh a, an thawm­hnawte hlipin, an lu an ziat kawlh a, mitthi vuina hun tlem te an siam bawk. Inrinni khan sorkar laipui leh Prime Minister-in an thil phutte an ngaihven theih nan an zunte an in a ni.

Kum 2016 aṭang khan Cauvery kam, hectare 29-a zauah chuan tui mamawh ang a awm loh avangin engmah chin theih a ni tawh lo a ni.