President candidate 2-ten nomination paper thehlut tawh

India ram President thar thlanna tura rorellai, BJP kaihhruai NDA candidate Droupadi Murmu-i leh eptu pawlte joint candidate Yashwant Sinha-te chuan nomination paper an thehlut ve ve tawh.

July 18-a President Ram Nath Kovind thlaktu tur thlanna neih tur atan, NDA candidate Murmu hian kar liam ta Inrinni khan nomination paper a thehlut a, eptu joint candidate Yashwant Sinha hian nimin khan a thehlut ve leh bawk. Nomination paper hi Rajya Sabha general secretary, returning officer hnenah an thehlut a ni.

Jharkhand governor hlui Murmu-i'n nomination paper a thehluhnaah hian prime minister Narendra Modi, defence minister Rajnath Singh, BJP president JP Nadda, home minister Amit Shah, BJP sorkarna state-a chief minister-ten an ṭawiawm a ni. Anni bakah BJP thawhpui Apna Dal, Janata Dal (U), YSRCP leh AIADMK hruaitute pawh an tel.

Thawhṭannia Yashwant Sinha-a'n nomination paper a thehluhnaah hian Congress hruaitu Rahul Gandhi, Samajawadi Party hruaitu Akhilesh Yadav, Trinamool Congress hruaitu Abhishek Banerjee, National Conference hotu Farooq Abullah, CPI hruaitu D Raja, CPM hotu Sitaram Yechury, DMK hruaitu A Raja, TRS hotu KT Rama Rao, RJS hruaitu Misa Bharti, RSP hotu NK Premchandran leh IUML hotu Mohammed Basir-ten an ṭawiawm. Hetih lai hian eptu party lam zingah National Democratic Alliance(NDA)-a tel lo party pariatte chuan an aiawh an tir lo thung.

Eptu party zingah BJD chuan NDA candidate Murmu hian state mi a nih avangin an thlawp dawn tih a sawi a, BSP hotu lu ber Mayawati pawhin eptu ṭangrual candidate siam dawn hian an party chu biakrawn a ni ve lo nia sawiin Murmu zawk chu an an thlawp dawn tih a sawi bawk.