Naxal helten CRPF ambush, sipai 25 kaphlum

Chhattisgarh-a Sukma district-ah Thawhṭanni khan Naxal helten security force ambush-in, Centre Reserve Police Force (CRPF) 25 an kaphlum a, parukin hliam an tuar. Kum sarih chhunga ṭum khata Naxal hel laka security force an thih tam ber ṭum a ni.

Thawhṭanni zing dar 8.30 vel khan CRPF 74 battalion-a sipai 99-te chuan Durgpal camp chhuahsanin, Chintagufa an thleng a, kawngpui siam hna thawhna chu lo enfiahin kawngah hian pawl hnihah an inṭhen a ni.

Hetihlai hian Naxal hel 300-400 vel chu he bial chhungah vek hian biruin, an zinga 150 chu fighter group ami te an ni. Security force-te’n an hmuh helho hi pawl hrang hrangah inṭhen darhin, chhun dar 12.25 vel khan IED tipuakin an lo ambush a ni.

Naxal helho hian security force-te beih nan hian AK-47 te an hmang tel a, security force ambush-naa an hotu ber hi Hidima niin CRPF lam chuan an sawi.

Security force-te beihnaah hian Naxal women wing pawh an tel a, March 12-a CRFP jawan hnen aṭanga silai an rukte an hmang a ni. Hel pakua thi zingah hian company commander Raghubir Singh pawh a tel. Helho hian sipai an kahhlumte ralthuam eng emaw zat an laksak nghal bawk nia sawia ni.

Union Home Minister Rajnath Singh chuan Sukma-a Naxal helho chetdan chu a dem thu sawiin, rawng taka inthahna thleng chu pawi a tih thu a sawi. Sipaite inpekna chu a thlawn mai dawn lo tih sawiin, minister chuan Naxal hluarna, Sukma biala hmasawnna hna thawh chu lo dan tumin helho chuan kawng hrang hrangin hma an la a ni, a ti.

Rajnath chuan helho laka chet lak dan pawh ngaihtuah ṭhat a ngai niin a sawi a, May 8 khian state hrang hrang official meeting pawh koh a nih tur thu a sawi.

Singh hian nimin dar 10.30 vel khan Raipur a tlawh a, he hmun aṭang hian helho kuta sipai thite thlahna inkhawm hmang turin Mana camp area-a Chhattisgarh Armed Force 4th battalion headquarters a pan nghal a ni. He hun hi Chhattisgarh Governor Balramji Das Tandon, Chief Minister Raman Singh, Union Minister of State for Home Hansraj Ahir bakah, state leh paramilitary official-te’n an ṭawiawm a ni.

Prime Minister Narendra Mod pawhin sipaite beih an ni chu a dem thu a sawi a, sipai thi chhungte a tawrhpui thu leh, sipaite thisen chu a thlawna a luanral loh tur thu a sawi bawk.