Tamil Nadu eptu hruaitu man

Tamil Nadu-a loneituten an loan ba ngaihdam leh khawkheng vanga harsatna tawkte chhawmdawlna pe tura sorkar an nawr mek an thlawpzia lantira nawrh huaihawttu, eptu pawl DMK hruaitu MK Stalin chu nimin zing khan police-te’n an man.

Tamil Nadu hian kum 140 chhung­a khawkheng nasa ber a tuar mek a, loneitu tam takin harsatna lian tak a tawk mek a ni.

Stalin hi Chennai aṭang km 300-a hla, Thiruvarur-ah party hruaitu dangte nen man a ni. Hemi bialah ve hian loneitute chu rel kawngah muin lungawi lohna an lantir bawk.

Tamil Nadu-a loneitu mi 200 vel chuan New Delhi-ah ni 40 dawn lung­awi lohna an lo lantir tawh a, mahse chief minister E Palaniswamy-a’n an harsatnate prime minister hnena thlensak a tiam avangin Thawhṭanni khan nawrh hi titawpin, an state lamah an kir a ni. Nimin khan loneitute an thlawpna lantir hian DMK chuan state pumah nawrh a lo huaihawt ve nghal bawk.