AIADMK hruaitu Dinakaran man VK Sasikala-i poster la thla

Tamil Nadu-a rorellai, AIADMK chhunga VK Sasikala-i leh O Panneerselvam-a lamṭangten party symbol an inchuh chungchang thu kal zelah, Thawhlehni zan khan Sasikala-i vahpa leh a thachhang dawltu, TTV Dinakaran-a chu man a ni.

TTV Dinakaran-a hi Panneerselvam-a pawlte nena AIADMK party symbol an inchuh­naah, Election Commission official-te tham tumah puh a ni a, a thurualpui Sukesh Chand­rasekhar pawh man a ni tawh bawk.

Delhi Police-te chuan Dinakaran-a hi a hmain ni li chhung thu an lo zawtfiah tawh bawk a, Thawhlehni zan zanlai vel khan Delhi-ah an man ta a ni. Delhi-a Dinkaran-a man a nih hnuah hian Chennai-a party main office-a VK Sasikala-i poster tarte chu lak thlak a ni. Sasikala-i hi a sum lakluh phu loa hausaa puhna thubuaiah thiam loh chantir a nih avangin Bengaluru jail-ah a tang mek. Jail-a dahluh a nih hma lawkin Dinarakan hi a deputy atan a ruat a ni.

AIADMK hotu lu, J Jayalalithaa-i a thih hnuah an party chhungah buaina awmin, pawl pahnih, Chief Minister hlui Panneerselvam leh Jaya-i thlaktu atana thlan Sasikala-i lamṭang pawlte an awm a ni. Mahse tun hnaiah pawl pahnihte hian inchhunfin leh tumin inbiakna an nei mek a, inchhunfin tura hma an lak meknaah party chhungaṭangin Sasikala-i leh Dinakaran-te hi party hruaituaṭanga bang tura phut an ni.

OPS-a lamṭangten an phut angin party office-a Sasikala-i poster leh banner tar te chu lakthlak an ni bawk.

Dinakaran-a hi ami chhawr hnenah Election Commission official thamna pek tur sum tam tham tak a pe nia puh chung­changah Delhi Police-te chuan ni li chhung thu an zawtfiah a ni. Police-te chuan Dinakaran-a hian Sukesh Chandrasekhar chu a hmu ngei tih pawh a sawi a, mahse pawisa erawh a pe lo niin a sawi.