MCD inthlanah BJP che ṭha

Municipal Corporation of Delhi (MCD) inthlan result chu nimin khan puan a ni a, BJP a che ṭha hle a, municipal corporation pathumah sorkarna a chang thei vek dawn a ni.

Inthlan hi North Delhi Municipal Corporation (seat 103), South Delhi Municipal Corporation (seat 104) leh East Delhi Municipal Corporation (seat 63)-ahte neih a ni a, candidate 2,537 an awm.

Seat awm zawng zawng 270-ah BJP chuan seat 184 lain, Congress party-in seat 27, Delhi-a rorellai AAP chuan seat 48 a la a, party dangin seat 11 an la bawk.

North Delhi Municipal Corporation-ah BJP hian seat 65 a la a, Congress-in 13, AAP-in seat 22 leh midangin seat thum an la.

South Delhi Municipal Corporation-ah BJP-in seat 70, Congress-in 11, AAP-in 17 leh midangin seat ruk an la a ni.

East Delhi Municipal Corporation-ah BJP chuan seat 49 a la a, Congress-in seat thum, AAP-in seat kua leh midangin seat 3 an la.

AAP chuan inthlanah hian BJP an chak theih nan EVM khawih chingpen niin an sawi a, Delhi mipuiten BJP an vote tlinna chhan tur a awm lo niin Deputy Chief Minister Sisodia chuan a sawi. BJP chu an chak a nih pawhin an chak ṭawk ṭawk rin a ni a, hetianga nasaa hnehna an chan theih dan hi thil awihawm lo tak niin a sawi.

Hetihlai hian BJP president Amit Shah chuan Delhi civil poll result chuan Prime Minister Narendra Modi-a kaihhruai sorkar rintawkna leh, AAP politics kalpui dan duh lohna lantirna chiang tak a ni, a ti.

Delhi Congress hotu Ajay Maken chuan civil poll neih zawh takah an party chuan pathumna chauh an hauh phak avangin, an party chet chhiat chhanah mawhphurhna lain party hruaitu a nihna aṭanga a ban thu a sawi. Midangte tana entawn tur siam a duh thu sawiin, party worker pangngai angin a awm zui dawn tih a sawi bawk