Firfiakten J&K-a army base an bei Sipai pathum kaphlum

Jammu and Kashmir-a Kupwara area-a army base chu nimin khan firfiakten an bei a, sipai pathum an thi. Army camp beitu firfiakte hi kahhlum ve nghal an ni. Firfiakten an kahhlum zingah hian Captain Ayush pawh a tel a ni.

Frifiakte hian J&K-a Indian security force te hi an bei fo tawh ṭhin a, tunhnaia army camp an beih tawhte chu

Pathankot - January, 2016

Kum 2016 January 2 zing khan Pakistan firfiakte chuan Pathankot, Punjab-a Air Force base an bei a, security force-te nen ni li chhung an inkah hnuah firfiak paruk kahhlum an ni. He inbeihnaah hian security force pasarih-te’n nunna an chan. Air Force beitute hi Pakistan firfiak pawl, Jaish-e-Mohammed te nia hriatb an ni.

Pampore - June, 2016

Kum 2016, June 25 khan J&K-a Pampore area-ah sipaite chuanna motor chu firfiakten beiin an pawng kah a, CRPF pariat an thih bakah mi dang 21 in hliam na tak an tuar a ni. Sipai beitute hi Lashkar-e-Taiba firfiakte an ni.

Uri - September, 2016

Hemi ṭuma army base beih hi kum tam tak chhunga amry base beihna rapthlak ber a ni. Pakistan firfiak pawl, Jaishe-Mohammad-te chuan Uri-a army base chu luhkhungin sipai 19 an kaphlum a ni. Sipai leh firfiakte hi darkar thum vel an inkap a, firfiak pathum kahlum an ni. Army beih a nih hnu ni 10-ah India sipaite chuan Pakistan ram chhungah surgical strike an va nei zui a, firfiakte hmunhma eng emaw zat an kahchhiat sak a ni.

Baramulla - October, 2016

Kum 2016, October 3 zanlai khan firfiakte chuan Baramulla khaw daia army camp an bei a, camp beitu firfiak pahnih kahhlum a ni a, BSF sipai pakhat a thi a, midang eng emaw zatin hliam an tuar. Pawikhawihtute hi Jaish-e-Mohammad firfiakte an ni.

Kupwara - October, 2016

Jammu and Kashmir-a Kupwara district-a Langate army camp chu 2016, October 6 khan beih a ni a, sipaite leh firfiakte chu inkap zuiin pathum kahhlum a ni.

Shopian - October, 2016

October 8, 2016 khan Kashmir-a Shopian district-a security post chu firfiakten beiin, police pakhat an kaphlum a, constable leh civil mi pakhatin hliam an tuar bawk.

Nagrota - November, 2016

Kum 2016, November 29 khan J&K-a Nagrota biala army camp chu firfiakten an kap a, sipai pahnih thiin midang pahnihin hliam na tak an tuar. Samba ditrict-ah ramri paltlanga India rama rawn luh tum firfiak pathum chu kahhlum an ni bawk.