PM-in UDAN flight hmasa ber vai liam
Prime Minister Narendra Modi chuan nimin khan sorkar laipui regional conectivity scheme hnuaia Shimla-New Delhi inkara flight hmasa ber, UDAN flight chu a vai liam. He scheme hnuaiah hian Shimla-New Delhi flight hi mi pakhat tan Rs 2,500 a ni.
PM hi Himachal Pradesh Governor Acharya Devrat, Chief Minister Virbahdra Singh leh Union miniser P.Ashok Gajapathi Raju, Jayant Sinha leh JP Nadda-te’n an ṭawiawm a, PM hian video conferencing hmangin Kadapa-Hyderabad leh Nanded-Hyderabad sector-a UDAN flight-te a vai liam nghal bawk.
Sorkar laipui chuan kum 2016, October thla khan thlawhtheihna hmanga bial hrang hrangte tlawhpawhna ṭha zawk kalpui nan ‘Ude Desh ka Aam Naagrik’ RCS (regional connectivity scheme) hi a siam a ni. Prime Minister chuan mi rethei zawkte thlawhtheihna hmanga an zin theih chu a duh tih a sawi.
UDAN scheme hi National Civil Aviation Policy (NCAP) peng pawimawh tak a ni a, he scheme hnuaiah hian aircraft hmanga darkar khat chin thlawh man emaw, helicopter hmanga darkar chanve zin thlawh man emaw chu Rs 2,500 ah bihthliah a ni.
Official thuchhuah chuan he scheme hnuaiah hian khawthlang biala airport 24, chhim lam biala airport 12, khawchhak lama 12 leh hmarchhak biala airport 6-te thlunzawm tum a ni.