Israel-in Hezbollah ralthuam dahna kap
Israel chuan nimin khan Syria khawpui, Damasus airport bula Lebanon helpawl, Hezbollah te ralthuam dahna hmun a bei niin Syria hel leh intelligence-te’n an sawi.
Syria President Bashar al-Assad-a kaihhruai sorkar leh helpawlten kum ruk zel tualchhung indona an neih mekah, Russia, Iran leh Shiite helte chuan President Assad-a hi an thlawp a, an zingah hian Hezbollah pawh hi an tel a ni. Hezbollah hi Israel hmelma, Iran nen an thawkdun ṭha hle nia sawi a ni a, Damascus airport pawh hi Tehran aṭanga ralthuam lakluhna hmun atan an hmang fo a ni.
Nimina Hezbollah-te ralthuam dahna hmun a bei nia sawi chungchang hi Israel chuan a la chhang lo. Mahse a hmain Hezbollah-te tana ralthuam pek a nih leh nih loh an thlithlai reng tur thu alo sawi tawh.
Mahse Lebabon-a al-Manar TV chuan Israel thlawhtheihna te hian warehouse leh fuel tank an kap fuh a, thil tam tak tichhe mah se nunna chan erawh an awm lo niin a sawi.