Venezuela-in OAS chhuahsan dawn

Venezuela Foreign Minister Delcy Rodriguez chuan Organization of American States (OAS) an chhuahsan dawn tih a sawi.

Nilaini-a TV-a thu a sawinaah minister chuan he thu hi a sawichhuak a, OAS chuan an ram inrelbawlna chu a ngaihpawimawh sak tawk lo nia sawiin, hei vang hian he pawl hi chhuahsan an tum tih a sawi. Nimin khan OAS hnenah hian an pawl member aṭanga an banna lehkha hi an pe a ni.

Minister chuan he thutlukna hi President Nicolas Maduro-a rawtna anga siam a nih thu a sawi a, OAS thiltihna reng rengah an tel tawh dawn lo tih a sawi.

Venezuela hian OAS secretary-general Luis Almagro chu President Maduro-a kaihhruai sorkar paihthlak tumnaah inrawlha a lo puh tawh a ni. Almagro hian President Maduro hi eptute chunga a chet danah dictator ang mai niin a sawi tawh a ni. OAS aṭanga an chhuah chhan chu a hma aṭanga an tum sa a ni lo a, mahse an ram mipuite zahawmna humhim nan an tih a ngai ta niin Rodriguez chuan a sawi.