Rajasthan state pumah thla 1 chhung atan CrPC Sect 144 puang

Rajasthan sorkar chuan Thawhlehnia Udaipur-a puanthui pakhat rawng taka thah a nih avanga buaina chhuak avangin state pumah thla khat chhung atan mi pali aia tam punkhawm khapna, CrPC Section 144 a puang.

Udaipur-ah Thawhlehni khan Hindu dawrkai, puanṭhui Kanhaiya Lal chu tun hnaia prophet Mohammad chungchang mawi lo taka a sawi avanga BJP thupuangtu a nihna aṭanga chawlh tir, Nupur Sharma-i a thlawpna thu social media-ah a post avangin mi pahnihin chem nen an bei a, a lu an tansak a ni.

Pawikhawihtute hi Riyaz Akhtar leh Ghos Mohammed nia sawi an ni a, Akhtar hian Kanhaiya kut a thlak lai hi Mohammad chuan a mobile phone-ah video-in a lo record a ni. A hnuah Kanhaiya an that lai video hi social media-ah post in, prime minister Narendra Modi chu thahah an vau zui bawk.

Udaipur SP Manoj Kumar chuan Thawhlehni zan khan Riyaz Akhtar leh Ghos Mohammed-te hi man nghal an ni tih a sawi.

Tualthahna rapthlak tak thleng vang hian mi tam takin lungawi lohna an lantir nghal a, hmun hrang hrangah buaina a chhuak zui bawk. Hei vang hian Udaipur-a hian Thawhlehni zan dar 8 aṭang khan curfew puan nghal a ni a, darkar 24 chhung mobile internet service pawh tihtawp a ni bawk. A hnuah state pumah punkhawm khapna hi thla khat chhung atan a puang zui nghal bawk.

Sorkar laipui chuan Udaipur-a tualthahna rapthlak tak thleng hi chhui chiang turin National Investigation Agency (NIA) a hriattir tawh a ni. He pawikhawihna thlengah hian pawl leh ram dang mi inhnamhnawih an awm leh awm loh uluk taka chhui a ni dawn a ni, a ti.