ED-in TMC hruaitute lakah thubuai ziaklut
Enforcement Directorate (ED) chuan nimin khan West Bengal-a rorellai, Trinamool Congress party hruaitute lakah thubuai 12 a ziak lut.
Nikum khan March thlaah Narada News website-ah TMC hruaituten thamna pawisa an dawng lai thla hi tihlan a ni.
Party hruaitute thamna la lai thla hi tihchhuah a nih hnuah Calcutta High Court chuan Central Bureau of Investigation (CBI) chu chhui chiang turin a ti a, mahse High Court thupek hi West Bengal sorkar chuan Supreme Court-ah a khing let a ni.
Supreme Court chuan CM thiltih dan hi sawiselin, party hruaitute thamnaa laa puh an nih chungchang hi chhui chiang turin CBI chu hriattirin, thla khat chhunga FIR ziak lut turin a ti a ni. He thil hi kum 2014-a thleng a ni a, thamna sum laa puh zingah hian minister ṭanglai, MP leh MLA 12 te an tel a ni. CBI-in FIR a ziahluh hnuah ED hian a chhui thubuai dang a ziahlut ve leh a ni.
Video-a lang TMC hruaitute hi Prevention of Money Laundering Act hnuaiah thubuai siamsak an ni.
CM Banerjee-i chuan party hruaitute thamna laa puhna, Narada scam tia sawi hian kum 2016 assembly inthlana hnehna an chan lohna tura an party beihna a ni tih a sawi. Central-a BJP kaihhruai sorkar chuan sorkar laipuiin pawisa note lian pahnih a tihthih na taka a dodal avangin hrem a duh niin a sawi