Punjab Assembly-in Agnipath scheme duh lohna resolution pass

Punjab Legislative Assembly chuan sorkar laipuiin sipai lak dan tur ruahmanna thar a siam, Agnipath scheme duh lohna resolution chu nimin khan a pass.

Chief minister, Aam Aadmi Party (AAP) hruaitu Bhagwant Mann chuan House-ah Agnipath scheme duh lohna resolution hi a pu lut a, sawiho a nih hnuah vote lak a ni. Resolution hi BJP MLA pahnih Ashwani Sharma leh Jangi Lal Mahajan chuan an dodal a, member dangte erawh chuan an thlawp vek thung.

Resolution pu luttu, CM Mann chuan he scheme chungchang hi prime minister Narendra Modi leh union home minister Amit Shah pawh a sawipui dawn tih a sawi a, he scheme hi India ram ṭhalaite tana thil ṭha lo tak a ni, a ti.

Leader of opposition, Congres MLA Pratap Singh Bajwa pawhin Agnipath scheme hi sut leh nghal turin sorkar laipui a phut thu a sawi ve bawk.

Sorkar laipuiin kum li chhung chauh sipaia ṭang thei tura sipai lakna dan thar a duan, Agnipath scheme hi tlangzarh a nih hnuah ram chhung hmun hrang hrangah ṭhalai, a bikin sipaia ṭan tumten nasa takin an dodal a ni. Lungawi lohna lantir a nih hnuah sorkar chuan he scheme hmanga sipaia lut thei tur, kum 17 leh a chanve leh kum 21 inkar china a bithliah chu kum 23 chinah a tisang leh a, hei bakah Agnipath scheme hmanga sipaia lut, Agniveer-te tan an term a tawp hnua hna dang an hmuh leh theihna tur ruahmannate pawh a siam belh leh bawk a ni.