India-ah Covid-19 kai Nuai 9 chuang tawh
India ramah Covid-19 hripui lengin ziaawm lam a pan thei lo a, nimina Ministry of Health and Family Welfare-in report an tihchhuahah chuan hri kai hmuh chhuah thar 28,498 lai an awm leh a, hri len ṭantirh aṭanga nimin thleng khan Covid-19 kai nuai kua chuang awm tawhin mi 9,06,752-in an kai tawh.
MoHFW report tihchhuah hma darkar 24 chhungin Covid-19 kai tawh dama puan mi 17, 989 an awm a, thi 553 an awm belh leh bawk. Hri kai enkawl dam tawh hi 5,71,460 awm tawhin enkawl dam tawh rate hi 63.02% a ni a, hri kai mek 3,11,565 la awmin thihpui 23,727 an awm tawh.
Indian Council of Medical Research (ICMR) chuan report an tihchhuahah darkar 24 chhungin sample 2,86,247 an test tih tarlangin hei hi ni khata sample test tam ber ṭum a ni leh a, hri len ṭantirh aṭanga nimina report an tihchhuah thleng hian sample 1,20,92,503 an test tawh a ni.
ICMR pawmpui Covid-19 test-na sorkar laboratory 853 leh private laboratory 353-ahte heng test hi an kalpui. State leh union territory recovery rate san zualnate chu Ladakh, Delhi, Uttarakhand, Chhattisgarh leh Haryana-te an ni a, heng state hian recovery rate 75% chuang an nei tawh. Hetihlai hian a number ang chuan Maharashtra-ah enkawl dam tawh an tam ber a, Tamil Nadu leh Delhi-in dawtin heng state pathumte hi hri kai tam zual state an ni nghal bawk. Arunachal Pradesh, Karnataka leh Meghalaya-te hi recovery rate tlemna state an ni thung.