Rajasthan Dy CM aṭangin Sachin Pilot bân

Rajasthan-a rorellai, Congress party chhunga buaina kal zelah, chief minister Ashok Gehlot laka hel, deputy chief minister Sachin Pilot chu Deputy CM leh state party chief a nihna aṭangin ban a ni a, amah thlawptu cabinet minister pahnih pawh ban an ni bawk. 

Congress party  thupuangtu, Randeep Surjewal chuan nimina press conference a neihnaah Pilot leh a thurual­puite pahnih ban an nih thu hi a puang. Party chhung buaina chinfel dan ngaihtuahin nimin khan Jaipur-ah Congress Legislature Party meeting vawi hnihna neih leh a ni a,mahse Pilot hi meeting-ah hian a tel duh lo leh a ni. Meeting zawh hnuah Congress hruaitu leh Deputy CM a nihna aṭanga ban a nih thu hi an puang ta a ni. 

Sujrewala chuan, "Congress chuan Sachin Pilot hi kum 30 chho a nihin union minister-ah a dah a, kum 40 chhoah deputy chief minister-ah a dah leh bawk. A tan hun ṭha tak kan siamsak reng a; MP, MoS leh state party president dinhmunte pawh a chelh a ni. Hetih laia BJP thangkama Sachin Pilot leh a thawhpui ṭhenkhatte an awk mai hi pawi ka tih hle a ni," tiin ban tur chungchang pawh rilru hrehawm taka an rel thu a sawi. 

Sachin Pilot ban a nih tak avangin Rajasthan Congress hotu thar atan Sikar Congress president hlui Govind Singh Dotasra chu ruat nghal a ni. Dotasra hi Rajasthan sorkara cabinet minister ni lai a ni. Youth Congress president thar atan MLA Ganesh Gogra ruat a ni bawk. Chief minister Ashok Gehlot chuan an party MLA ṭhenkhat hel mah se, a kaih­hruai sorkar dinhmun a derthawng lo tih a sawi. Nimina CLP meeting-ah hian Gehlot thlawptu MLA 102 an tel. Member 200 awmna Rajasthan assembly-ah  hian sorkar siam turin MLA 101 neih phak a ngai a ni.

 

CM hian Raj Bhavan-ah Governor Kalraj Mishsra hmuin, amah thlawptu MLA list hi a thehlut nghal a ni. Sachin Pilot chuan ban a nih hnuah a twitter-ah thudik chu sawibuai theih ni ṭhin mah se, hneh thei a ni ngai lo tiin a sawi. A twitter-a "Deputy Chief Minister of Rajasthan President, Rajasthan Congress" tih a dah pawh paih nghalin, 'MLA from Tonk' tih chiah a dah nghal.