Maharashtra : Chief Minister atan Eknath Shinde lalut 'Hindutva' tan he thil hi ti kan ni - Shinde

Maharashtra-a Shiv Sena MLA lungawi loa tlan tau zinga an hotupa Eknath Shinde chu Chief Minister thar atan lakluh a ni a, BJP nen an thawk dun a ni.

Maharashtra-ah hian Shiv Sena, National Congress Party leh Congress party-te chuan ṭangrual sorkar - Maha Vikas Aghadi (MVA) an din a, MVA-a lungawi lo Shiv Sena MLA-te chu chhuak tauin BJP nen an thawk dun ta a ni.

Shiv Sena MLA hel hruaitu, Eknath Shinde chu BJP nena sorkar thar an siamah chief minister atan ruatin, nizan khan rinawmna thu tiamtira lakluh a ni.

MLA helte hian NCP leh Congress party an thawhpui theih tawh loh thu an sawi hnuah, BJP hruaitu leh leader of opposition, Devendra Fadnavis chuan Uddhav Thackeray kaihhruai MVA sorkar chuan thlawptu a nei ngah tawk tawh lo tih sawiin, governor Bhagat Singh Koshyari hnenah House-ah floor test nei turin ngenna a thlen.

MVA sorkar chuan Supreme Court-ah floor test neih tur hi dang turin a ngen a, mahse court hian an ngenna hi a hnawlsak avangin Nilaini khan Uddhav Thackeray chuan chief minister a nihna aṭangin banna a thehlut a ni.

Video hmanga a ban thu a puannaah, Uddhav Thackeray chuan ṭang rual sorkarin harsatna an tawhah theihtawpa an thlawp avangin Congress president Sonia Gandhi leh NCP hotu Sharad Pawar-te chungah lawmthu a sawi. Vanduaina nasa tak a rawn thleng ta a ni, tiin Thackeray chuan Shinde leh a lamṭang MLA-te chet dan chu pawi a tih thu a sawi a, heng MLA helte hi an duh ang apiang a pe tih a sawi bawk.

Thackeray-a'n banna a thehluh hnuah Shinde leh Fadnavis-te hian nimin tlai khan Governor Koshyari hi hmuin, sorkar thar an siam theih thu an thlen a ni. Governor an hmuh hnu lawkah Fadnavis chuan sorkar thar siamin, Shinde chu chief minister thar a ni dawn tih a puang.

Shinde chuan BJP nena thawkdun a, sorkar thar siam tura thutlukna an siam chhan chu Hindutva tan a ni, hei bakah hian an MLA-te bial hmasawnna tur a ni bawk a ni, a ti. BJP chuan MLA ngah zawkin Fadnavis chu CM pawh ni zawk tur a ni a, mahse rilru ṭha tak puin CM post chu Shiv Sena lam tan an pe a, hei vang hian a lawm hle tih a sawi. Shinde hian thlawptu MLA 50 a nei tih a sawi a, heng zingah hian Shiv Sena MLA 40 an tel a ni. BJP hian MLA 120 a nei bawk.

Maharashtra-a sorkar thar chu prime minister Narendra Modi, union home minister Amit Shah leh BJP president JP Nadda-te pawhin an thlawp tlat dawn a ni, tiin Shinde chuan a sawi zui bawk.