Iran-in India thawhpuina A titawp

Iran chuan India a thawhpuina, an rama rel kawng siamna tur, Chabahar Railway Line Project-ah India aṭanga fund an dawn har vangin India an thawhpuina a titawp.

Kum li chhung thawh tura duan, Chabahar Railway Line Project atan hian kum 2016 May thlaa prime minister Narendra Modi-a'n Iran khawpui Tehran a tlawh ṭum khan Chabahar agreement a ziak a, Modi bakah hian Iran president Rouhani leh Afghanistan president Ghani chuan inremna hi an ziak ve bawk a ni.

Ram pathum thawhhona tur hi Afghanistan aṭanga Central Asia kalpawhna tur a ni a, Indian Railways Construction Ltd (IRCON) chuan hemi atana service, superstructure work leh  financing lam zawng zawng chu a thawh tur thu a intiam a, US dollar vaibelchhe 1.6 ruahman a ni. Chabahar Railway Line Project hi kum 2022 March thlaa zawh hman tum a ni. 

Iran-a Chabahar port leh rel kalkawng siamna turah hian India chuan tun thleng an inremna an ziah ang hian Iran fund a la pe lo. Fund hi  a pek chuan US lamin an hrek theih dawn avanga tun thlenga la pe lo niin media-te chuan an tarlang. Hemi chungchangah hian Ministry of External Affairs leh IRCON lam chuan thuchhuah engmah an la siam lo.

Iran-in India a thawhpuina a titawp hi fund a pekchhuah har vang ti bawk mah se, China a thurualpui nia sawi a awm. Iran hian kum 25 chhung economy leh security lamah thawhdunna, US dollar tld 400 hu chu China nen lo ziakfel tawh a ni.  He thawhdunna  hmang hian China chuan Iran-a banking, telecommunication, port, rialways leh project dang eng emaw zatah a huang a zuah thei dawn a ni.