J&K CM-in tualchung buaina chungchang PM sawipui

Jammu & Kashmir Chief Minister Mehbooba Mufti-i chuan nimin khan Prime Minister Narendra Modi chu New Delhi-ah a hmu a, state chhung buaina thleng mek chungchang a sawipui.

State chhunga tharum thawhna thleng fo thunun thei loah Mufti-i kaihhruai sorkar hi puh a ni fo a, sawisel a tawk fo bawk a ni. Nimin khan Mufti-i hian buaina chingfel tura inbiakna neih a ṭul thu PM hi a sawipui a ni.

Mehbooba Mufti-i chuan an state dinhmun tawn mekte chu PM hi sawipuiin, sorkar laipui chuan state mipuite dinhmun chu ngaihven deuh se a duh thu a sawi. An buaina tawh mek chinfel dan kawng awmchhun chu inbiakna neih a nih thu a sawi bawk.

PM nena meeting an neih zawh hnua chanchin thar lakhawmtute a kawmnaah, Mufti chuan an state-a by-election neih zawh taka buaina chhuak chungchang an sawidun tih sawiin, buaina chu tihtawp thuai a ngai a ni, a ti.

State chhunga buaina thleng mek chinfelna kawng­ah, ṭangrual sorkar siamtu PDP leh BJP ngaihdan hi a in ang lo nia sawi a ni. Mufti-i chuan, ‘Vajpayee-a hmathlir leh hmachhawp avangin BJP leh PDP hi thawkdun an ni a, hei hi PM Modi pawhin a sawi tawh a ni. Vajpayee-a hunlai aṭang khan inlakhran duhtu pawlte inbiakna neihpui alo ni tawh a, hei hi kan chhunzawm leh thei a ni”, tiin a sawi. Mipui lungawi lo, security force-te lunga tawngtute, sipaiten musep hmanga an chhang let ṭhin chu tihtawp a ngai tih a sawi bawk.

Hetih lai hian BJP minister Chander Prakash Ganga chuan sorkar chu na taka che tura a duh thu a sawi thung a, ram phatsantu leh security force-te lunga tawng ṭhinte chu musep hmang chuan chhan let an ni tur a ni, a ti.

Nimin vek khan Union Home Minister Rajnath Singh chuan security hotute chu Kashmir Valley-a buaina thleng chungchang a sawipui. Minister leh security hotute hian boruak muanawm a awm leh theihna tura hma lak dan turte an rel a ni.

Home Minister hian National Security Advisor Ajit Doval, Home ministry top official te, paramilitary force leh intelligence agency hotute chu J&K-a ramri paltlanga firfiakte an luh ṭhin dan chungchangte a sawipui bawk a, official-te chuan International Border leh Line of Control-te chu khauh zawka veng turin a tibawk.