TN loneituten nawrh tihtawp lailawk
Tamil Nadu loneitute chuan state Chief Minister E Palaniswamy-a’n an tan theihtawp chhuah a tiam hnuah, May 25 thleng atan nawrh an titawp lailawk.
Tamil Nadu loneitute hian New Delhi khawpuiah nawrh hi an huaihawt a, an loan ba ngaihdamsak leh, khawkheng avanga harsatna tawk loneitute chhawmdawlna pek an phut a ni. Pathianni khan CM Palaniswamy hian nawrh huaihawtte hi hmuin, an harsatna tawh mek chungchang chu PM Narendra Modi-a sawipui a tiam a ni.
Loneitute hian an thil phut nawr nan hian New Delhi-a Jantar Mantar-ah ni 40 dawn nawrh an huaihawt tawh a ni. Hemi chhung hian Jantar Mantar kawngpuia lum `Angapradakshinam`, mitthi vuina lem hun buatsaih te an neih bakah, an hmuihmulte an met bawk a ni. Prime Minister office kawtah an thawmhnaw te hlipin, kawngpuiah chaw leh dal te an ei a, sazu te ei telin, an state-a loneitu leiba ngah avanga mahni intihlum te luruh nia sawite an awrh tel bawk.
Harsatna an tawh avanga nationalised bank aṭanga an loan lak leibate ngaihdam an nih theih nan sorkar laipui chu inrawlh turin a ngen a,hetihlai hian state sorkar leh Madras High Court chuan co-operative bank aṭanga an loan ba te chu an lo ngaihdam sak tawh a ni.