Nupur Sharma hian ram pum hnenah ngaihdam a dil tur a ni : SC
Supreme Court chuan prophet Muhammad chungchang a sawi dan avanga ram chhung hmun hrang hranga buaina chhuah phahah BJP spokesperson hlui Nupur Sharma chu puhin, he thil avang hian India ram pum hnenah ngaihdam a dil tur a ni, a ti.
Judge-te chuan prophet Muhammad avanga ram chhunga buaina chhuak chungchangah, Nupur Sharma ngei chu mawhphurtu a ni tiin an sawi.
June thla tir lama TV debate an neihah Sharma hian prophet Muhammad a sawichhiat avangin India ramah buaina nasa tak a chhuak a, Gulf ram tam tak pawh lungawi loin an rama India palaite pawh an koh phah hial a ni. A thusawi chungchanga nasa taka sawisel a nih hnuah, BJP chuan Nupur Sharma hi BJP spokesperson a nihna aṭangin a ban a ni.
Justice Surya Kant chuan, " Debate-a a thusawi dante hi kan lo hmu a ni. A thusawi duh dante leh, a hnuah lawyer a nih thu a sawite chu a zahthlak takzet. Hei vang hian ram pum hnenah ngaihdam a dil ngei tur a ni," tiin a sawi. Debate-a a thil sawi dan chungchangah Sharma chu ṭawngkam thlahdah lutuk tiin Court chuan a sawi zui bawk.
A thusawi avang hian hmun hrang hrangah Nupur Sharma lakah FIR thehluh a ni a, Sharma hian a nunna atan a derthawng nia sawiin heng thubuaite hi Delhi-ah sawn sak vek turin a ngen a, hei hi nimin khan court chuan a ngaihtuah a ni.
Supreme Court chuan Sharma-in 'ang khata en' leh 'inthliarhranna awm lo' chungchanga a thusawi chu chhangin, "Midang laka FIR i thehluh chuan man nghal an ni a, mahse i laka thehluh a nih ve thung erawh chuan tumahin i lakah engmah an ti ngam lo," tiin Sharma thusawi dan chuan a mizia, mi invaivung leh ngeng tak a nih zia a tilang a ni, a ti bawk. 'Party thupuangtu niin, thuneitute lamin an thlawp tlat dawna a hriat avangin, ram dan pawh engah mah ngai loin a duh duh anga thu sawi theiin a inngai a ni," a ti.
Sharma lawyer chuan TV debate-ah hian anchor-in a zawhna chauh a chhang niin a thlavang a hauh a, mahse court chuan hei hi thudik a nih chuan host pawh thubuai siamsak a ngaih ve thu a sawi zui.
Nupur Sharma lawyer-in mi tinten an duh ang sawi turin dikna an neih thu a sawi chu Supreme Court-te chuan elsen zuiin, "Democracy ramah chuan tupawhin an duh sawi turin dikna an nei. Democracy ramah chuan hnim chuan ṭo turin dikna a nei a, sabengtung pawhin hnim ei turin dikna a nei," an tih khum.