Punjab-ah chhungkaw tinte electric unit 300 a thlawnin pe dawn

Punjab chief minister Bhagwant Mann chuan a kaihhruai Aam Aadmi Party (AAP) sorkar chuan a lo intiam tawh angin, July thla aṭangin an state-a chhungkaw tinte chuan thla tin electric unit 300 chin a thlawnin an hmang dawn tih a puang.

CM Mann chuan, "Sorkar hmasate khan inthlan dawnah thil an tiam ṭhin a, mahse an thutiamte an tihpuitlin hmain kum nga a liam leh mai ṭhin. Kan sorkar chuan Punjab tana entawn tur kan siam a ni. Vawiin hian Punjab mite hnenah kan lo tiam tawh chu kan tihlawhtling dawn a, vawiin aṭangin Punjab state-a chhungkaw tinte chuan thla tin electric unit 300 chin a thlawnin an hmang thei dawn a ni," a ti.

AAP hruaitu leh Rajya Sabha MP Raghav Chadha chuan Punjab chu Delhi dawtah mipuite tana a thlawna electric pe thei state a ni tiin, Punjab state tan ni chhinchhiah tlak a nih thu a sawi.

June 27-a state finance minister Harpal Singh Cheem-a'n state budget a pharh khan, chhungkaw tin hnenah eletrict unit 300 a thlawna pek a nih tur leh, hemi atan hian state sorkarin cheng vaibelchhe 1,800 a sen tur thu a lo sawi tawh a ni. He scheme atana sum tam tak an mamawh turte hi state sorkarin ṭul loa sum a hmante titlem leh, chhiah an lakkhawm aṭangin phuhruk an tum dawn tih a sawi bawk.