Maha Assembly special session nei dawn

Maharashtra Legislative Assembly special session, ni hnih awh tur chu naktuk aṭangin neih a ni dawn.

State legislature secretariat July 3 hian House Speaker tur thlan a ni dawn tih a sawi nghal a, a chuh tumte tan vawiin chhun dar 12 thleng nomination thehluh theih a ni ang.

Shiv Sena MLA hel leh BJP thawkdunten sorkar thar an siam governor Bhagat Singh Koshyari an hrilh hnuah, Ningani zan khan chief minister atan Shiv Sena MLA hel hruaitu, Eknath Shinde chu lakluh a ni. BJP hruaitu leh CM hlui, Devendra Fadnavis chu deputy CM atan lakluh a ni bawk. Lakluh an nih hnuah Shinde kaihhruaiin cabinet meeting neih nghal a ni a, assembly special session neih tur hi an rel a ni.

Assembly special session-ah hian Shinde hian thlawptu a ngah tawk leh tawk loh fiah a ni ang. Shinde hi Shiv Sena MLA hel 39 bakah party tenau leh independent MLA 10-ten an thlawp a, BJP hian MLA 106 an nei bawk. Maharashtra Legislative Assembly-ah hian seat 288 a awm a, sorkar siam tur hian MLA 145 thlawpna neih a ngai a ni.