Maha Assembly Speaker atan Rahul Narwekar thlang

Maharashtra Legislative Assembly speaker thar atan nimin khan BJP MLA Rahul Narwekar chu thlan a ni.

Shiv Sena Party-a Eknath Shinde lamṭang pawl leh BJP thawkdunin sorkar tharah hian chief minister atan Eknath Shinde leh, deputy chief minister atan BJP hruaitu Devendra Fadnavis-te chu lakluh an lo ni tawh.

Nimina House Speaker tur thlannaah hian, kum 45 mi Narwekar hian Uddhav Thackeray lamṭang Shiv Sena candidate Rajan Salvi chu vote 50 chuangin a hneh. Narwekar hi a hmain Shiv Sena leh Nationalist Congress Party-ah a awm tawh ṭhin a, NCP senior leader Ramaje Naik-Nimbalkar-a makpa a ni.

Shiv Sena party-a Youth Wing-ah spokesperson a ni ṭhin a, mahse kum 2014 khan chhuahsanin Nationalist Congress Party a zawm. Kum 2019-a Maharashtra assembly inthlan neih dawn khan BJP zawm lehin, Colaba bialah BJP ticket hian thlan tlin a ni.

Chief minister Shinde kaihhruai sorkar hi vawiinah floor test neih a ni dawn a, mahse Speaker thlannaa vote tlak dan aṭangin he fiahna hi awlsam taka a paltlang rin a ni. Shinde thlawptu Shiv Sena MLA helte chu Inrinni zan khan Assembly special session-a tel turin Goa aṭangin chartered flight hmangin Mumbai-ah an kir tawh a, Mumbai-ah hian Assembly House awmna, south Mumbai lama luxury hotel-ah dah khawm an ni. Shinde hian thlawptu MLA 50 a nei a, heng zingah hian Shiv Sena MLA hel 39 an tel a, midangte chu party tenau leh independent MLA-te an ni.

Member 288 awmna, Maharashtra Legislative Assembly-ah hian Shiv Sena hian MLA 55, NCP-in 53, Congress 44, BJP 106, BhujanVikas Aghadi 3, Samajwadi Party 2, AIMIM 2, Prahar Janshakti Party 2, MNS 1, CPI (M) 1, PWP 1, Swambhimani Paksha 1, Rashtriya Samaj Paksha 1, Jansurajya Shakti Party 1, Krantikari Shetkari Party 1, leh Independent MLA 13 an awm mek. Shiv Sena MLA zinga a tam zawk hian Shinde hi an thlawp a ni.