Kum 30-40 thleng hi BJP hun a la ni dawn : Amit Shah

BJP senior leader leh union home minister Amit Shah chuan nimina an party national executive meet neihah kum 30-40 lo la awm tur thlengin BJP hun a ni dawn a, India ram chu khawvel hruaitu, 'vishwa guru' ala ni dawn a ni, a ti.

Ni hnih awh party national executive meet hi Hyderabad International Convention Centre-ah neih a ni a,Amit Shah bakah party national president JP Nadda, BJP sorkarna state 19-a chief minister-te leh BJP senior leader-te an tel.

Amit Shah chuan hmarchhak bial buaina pawh chinfel dan an hre tawh tih sawiin, kum 2024-ah chuan harsatna awmte chu chinfel kim vek a ni tawh dawn a ni, a ti. BJP chuan Telangana leh West Bengal-a chhungkaw rorelna chu a titawp dawn a, Andhra Pradesh, Tamil Nadu leh Odisha-ah pawh sorkarna an siam leh ngei dawn tih a sawi.

Tun hnaia inthlan leh by-election neihah BJP chet ṭhat dan aṭang chuan mipuite an party hnathawh leh hmasawnna an dah pawimawhnate an thlawpzia a lang a ni tiin Amit Shah chuan a sawi bawk.