Amarnath Yatra : Mi 40,000 chuangin Holy Cave tlawh tawh

Official-te chuan June 30 aṭanga Amarnath Yatra neih a nih aṭangin, mi 40,000 chuangin Kashmir chhim lama holy cave chu an tlawh tawh tih nimin khan a sawi.

Hetih lai hian yatra hmanga kal mi panga an thi a, an zinga pathum chu heart attack vanga thi an ni a, pakhat chu hriselna loh dang vang niin, pakhat dang chu sakawr aṭanga a tlak vangin a thi a ni.

Hri leng vanga kum hnih chhunga an neih theih loh hnuah, kumin June 30 aṭang khan Amarnath Yatra hi neih ṭan a ni a, August 11 thleng neih a ni ang. Kuminah hian yatra hmanga kal hi kum dang aiin an tam rin a ni. Holy cave panna atan hian kawng pahnih, South Kashmir-a Anantnag district-a Pahalgam route leh central Kahsmir-a Ganderbal district-a Baltal route te hman a ni.

Yatra hman chhunga venhimna lam uluk taka kalpui tum a ni a, thil awmdante thlithlai a, venhimna kalpui dante enfiah turin paramilitary force, Army leh intelligence hotute chuan Jammu and Kashmir hi an tlawh dawn a ni. Yatra neih chhung hian firfiakte pawikhawihna an thlen hlauhthawnna avangin, metre 3,880 sanga awm cave shrine panna kawngahte venhimna uluk taka ruahman a ni bawk.

National Investigation Agency (NIA) hotu thar Dinkar Gupta chuan Kashmir a thleng tawh a, Army chief Gen Manoj Pande pawhin kal thuak a tum bawk. Army hian cave panna kawng pahnih leh cave-a hian venhim hna thawk turin sipaite a dah a ni.