Maharashtra Chief Minister thar Eknath Shinde-a'n fiahna paltlang

Maharashtra chief minister thar, Eknath Shinde chuan nimin khan a kaihhruai sorkarin thlawptu a ngah tawk leh tawk loh fiahna chu awlsam takin a paltlang.

Assembly-a sorkar fiahnaah hian Eknath Shinde thlawp lamah vote 164 a tla a, a thlawp lo lamah vote 99 a tla thung. Pathiannia House Speaker thar thlanaah khan eptu thlawptu lamah vote 107 a tla a, nimina sorkar fiahnaah hian eptu lam pakhat chuan Shinde thlawp lamah a vote a, eptu MLA ṭhenkhat chu vote laknaah hian a tel lo bawk a ni.

Nimina vote lak hma lawk hian Shiv Sena party-a Uddah Thackeray lamṭang MLA pakhat, Satnosh Bangar chuan Shinde lamṭang pawl a zawm a, Shinde hian Shiv Sena MLA zingah lamṭang 40 a nei ta a ni.

Shiv Sena-a Uddhav Thackeray lam chuan Pathiannia House Speaker atana thlan thar, Rahul Narvekar-a'n Sena party chief whip Sunil Prabhu hnawl a, chief whip aṭanga Shinde lamṭang Bharat Gogawale a ruat leh, Shiv Sena legislative party leader atana Shinde a dah chu an pawm loh thu sawiin, Supreme Court-ah an khing. Court chuan Thackeray lamṭangte petition thehluh hi July 11-a ngaihtuah a remti thu nimin khan a sawi.

Justice Indira Banerjee kaihhruai vacation bench chuan summer break an neih zawh, July 11-ah case dangte nen a ngaihtuah dawn tih a sawi a ni. Thackeray lamṭangte aiawhtu, senior advocate AM Singhvi chuan chief whip ruat leh lo pawm chungchang hi Speaker thuneihna piah lam a nih thu a sawi a ni.

Speaker atana thlan tlin a nih hnu lawk, Pathianni zan khan hriattirna tichhuakin, Narvekar hian Shiv Sena legislative leader, Thackeray-a lamṭang zinga mi, MLA Ajay Chaudhary chu banin, Shinde chu leader-ah a dah a, Sena chief whip thar tur hi a ruat a ni.