Rahul Gandhi chungchanga video lem siama puh ; BJP MP 2 lakah Congress party-in FIR thehlut

Congress party chuan an party hruaitu, Rahul Gandhi chungchanga video lem siam a, inhuatna chawk tho thei zawnga cheah puhin BJP MP pahnih, Rajyavardhan Singh Rathore leh Subrat Pathak-te lakah FIR an thehlut.

Party media leh publicity team hotu, Pawan Khera chuan MP pahnih leh midang pathumte lakah hian Chattisgarh-a Bilaspur-ah FIR hi thehluh a ni tih a sawi. Delhi, Jharkhand, Maharashtra, Madhya Pradesh, Rajasthan leh Uttar Pradesh-ah pawh complaint an thehlut bawk tih party social media in-charge Supriya Shrinate chuan a sawi bawk.

Congress general secretary Jairam Ramesh chuan BJP president JP Nadda hnenah, Rahul chungchanga thu dik lo thehdarh a, video lem siamtu BJP hruaitute chungah chuan action la tur leh, video an siam danglam chu an Twitter aṭanga paih tir turin a ngen.

Shrinate chuan Rajyavardhan Singh Rathore chetdan chu pawisawina leh hel tura mipuite fuihpawrhna a ni, tiin thu dik lo a thehdarh chu India ram inlungrualna tihchhiat tumna a ni, a ti. Thil pawi tak chu hetianga dawt thu thehdarh ṭhinte hian BJP-ah dinhmun ṭha tak an chan phah zawk a, I&B minister pawhin Delhi-a intualvuakna thleng chungchang dik lo taka a sawi hnuah dinhmun sang zawkah dah a ni, a ti.

BJP hruaituten video an tihdarh hi Rahul Gandhi-a'n a bial, Wayanad office suasam a nih chungchang a sawina a ni a, mahse he video hi siam danglamin, tun hnaia Udaipur-a prophet Muhammad sawichhetu,BJP hruaitu Nupur Sharma thlawpna thu a post avanga thah, Kanhaiya Lal chungchang a sawina angin an lantir a ni.

Shrinate chuan BJP chuan Rahul Gandhi leh an party hruaitu dangte chu firfiak nena inzawmna nei anga lantir an tum nia puhin, social media chu hman thiam a ṭul thu a sawi a, mipuite kaihhnawih thil te, policy sawihona atan te, hmasawnna tura thurawn inpekna atante hman thiam a ngai a ni, a ti. BJP zawk chu firfiak nena inzawmna nei an ni tih hriatchhuah a ni zawk a, Pathiannia Kashmir-a firfiak an man, Talib Shah chu he state-a BJP minority cell member a ni, a ti. Udaipur-a Kanhaiaya Lal thattu bera puh, Riaz Attari pawh chu BJP member a ni tih sawiin, kum 2019 November thlaa BJP Udaipur chief-in party member atana a lakluh lai thlalak ngei pawh a awm thu a sawi.