EC-in all party meeting ko dawn

Chief Election Commissioner Nasim Zaidi chuan Election Commission chuan electronic voting machines (EVM) chungchang sawiho turin all party meeting a ko thuai dawn tih a sawi.

Central-a eptu party hrang hrang chuan tunhnaia assembly inthlan neihnaa an chak loh chhuanlamah EVM hi hmangin, BJP in a khawih chingpen niin an puh. Mahse EC chuan EV-te hi khawih danglam mai theih a nih loh thu leh, a him tawk a ni tih party hrang hrangte hi sawipui a duh niin a tarlang.

EC hian inthlan felfai leh langtlang zawka kalpui leh, mipuiten vote thlak dan kalphunga rinna an nghah ngam zawk nan EVM chu Voter- Verified Paper Audit Trail (VVPAT) nena thlunzawm vek a tum a, EVM leina tur sum pe tura a ngenna pawh union cabinet-in a remtihsak tawh bawk.

Eptu party 16-te chuan vote thlak dan kalphung hi thlak a, EVM aiah paper ballot hman leh an phut a, mipuiten EVM an rinna chu a tlahniam tawh a ni, an ti.

Delhi Chief Minister Arvind Kejriwal-a chuan EVM hi khawih chingpen niin a lo sawi fo tawh a, BSP hruaitu Mayawati leh SP hotu Akhilesh Yadav-te pawhin a rintlak chiah em tih rin a har tawh niin an sawi bawk.

EC chuan EVM hi khawih chingpen theih a ni lo tih lantir nan a duh a piang tan fiahna hun pawh hawn a tum tih a sawi.