Odisha-in Posco Project atana ram a pek a sut leh

Odisha sorkar chuan South Korea steel company lian, Posco hnena steel plant siamna tur, Paradip bula ram a pek chu a sut leh.

Industries Minister Debi Prasad Mishra chuan Posco-India hnenah hian state sorkar hnuaia Industrial Infrastructure Development Corporation (IDCO) chuan hriattirna pein, company tana ram hawh tur a pek hi kum thum chhung pawha khawih a nih loh avangin a ram pek hi a sut leh tih a sawi.

Posco hian IDCO hnenah Paradip bula 12-mtpa steet plant project a thawh theih loh thu hi a lo hrilh tawh a, Odisha sorkar hnenah a ram pek hi la kir leh mai tur pawhin a lo hrilh tawh a ni.

State sorkar hian Posco project thawhna tur hian Jagatsinghpur district-a Kujang leh Erasama-a forest land acre 1,301 leh non-forest land acre 578-a zau chu a pe a ni. Mishra chuan state industries deparmtent chuan Posco project tan hian ram acre 2,700-a zau a pe a, heng zinga acre 1,800 chu company hnenah hian hlanin, a bak la awm chu stat sorkar kutah hlan a ni, a ti.

Posco India hian kum 2005, June 22 khan Odisha sorkar nena Paradip bula cheng vaibelchhe 52,000 senaga 12 mtpa steet plant siamna turin inremna a lo siampui tawh a ni. MoU an ziah hi kum 2010 khan a tawp a, mahse tihnun thar leh a ni.