Rahul Gandhi thusawi dik lo taka tichhuaktu TV news anchor kawltu nih state pahnih police-te'n inchuh

Zee TV news anchor, Rohit Ranjan chu Congress party hruaitu, Rahul Gandhi thusawi dik lo taka tichhuaktu chu Congress leh BJP sorkarna state pahniha police-ten kawl an inchuh. Chhatisgarh police-ten man an tum laiin Uttar Pradesh police-ten lo lak khalhin, hmun puanzar lohah an hreng zui a ni. News channel hian an thil tihchhuah avang hian thupha pawh an lo chawi tawh bawk.

Congress sorkarna state Chhattisgarh police-te hian nimin zing khan Delhi-ah news anchor hi man an tum a, mahse BJP sorkarna Uttar Pradesh-a Ghaziabad police-te chuan lo dangin, anmahni zawk hian Rohit Ranjan hi an lo hreng a ni.

Rohit Ranjan hian amah man tumin Chhattisgarh police-te an lo kal nia sawiin Uttar Pradesh police-te chu pui turin a twitter-ah a ngen a ni. Chhattisgarh police-te hian local police-te pawh hriattir loin hruai an tum niin a puh a, mahse Chhattisgarh police-te chuan court warrant an neih avangin midang hriattir kher a ngai lo tih an sawi thung.

Chhattisgarh police-ten an man hmain Ghaziabad police-te chuan Ranjan hi an lo hruai a, UP police kutah awm mekin thubuai pawh khirhkhan lo zawk siamsak a nih rin a ni.

Rohit Ranjan hian TV-a a show-ah Rahul Gandhi-a'n Kerala-a Wayanad-a a office suasam chungchang a sawi chu tun hnaia Udaipur-a BJP hruaitu hlui, Nupur Sharma-i a thlawpna thu a post avanga Hindu mi pakhat thah a nih chungchang sawina angin a tichhuak a ni. He video a siam danglam hi BJP hruaitu Rajyavardhan Rathore chuan Rahul Gandhi beihna atan a twitter lamah pawh a lo tichhuak ve leh a, Congress party hian Rajasthan leh Chhattisgarh-ahte Rathore lakah hian FIR pawh an lo thehlut tawh bawk a ni.

Zee News channel chuan an video tihchhuah avang hian thupha an chawi a, Ranjan pawhin Gandhi thusawi chungchang dik lo taka Udaipur-a thil thlenga sawi zawmtir a ni chu an tihsual a nih thu sawiin ngaihdam a dil tawh bawk. Video-ah hian Rahul Gandhi hian a office suasamtute chu an naupang, ngaituah thui lo tak an nih avangin ngaihdam an ngai a ni tiin a sawi a, hei hi Udaipur-a tualthattute a sawina anga tihchhuah a nih avangin sawisel pawh a hlawh phah hman hle.