Vice President thlanna neih tur atan hriattirna tichhuak

Election Commission of India chuan August 6-a India Vice President thlanna neih tura atan nimin khan hriattirna a tichhuak.

Vice President nilai, M Venkaiah Naidu term chu August 10 hian a tawp dawn a, Vice President thar hi August 11-ah lakluh a ni ang.

Inthlana chuh tumte tan July 19 thleng nomination paper a thehluh theih dawn a, July 20-ah paper-te hi enfiah niin, inhnukdawk duhte tan July 22 thleng hun hawn a ni. Candidate-ten nomination paper an thehluhah hian proposer atan elector 20 tal leh seconder tur elector 20 talin an hming an ziah hnan a ngai ang. Elector hian nomination paper pakhatah pawh proposer leh seconder angin a ziak thei ang.

Candidate-te hian nomination paper hi pali chin an thehlut thei dawn a, security deposit Rs 15,000 an dahkham a ngai dawn bawk a ni.

Vice President Election vawi 16-na neih tur hi member 788 awmna Electoral College in a thlang dawn a ni. Electoral college-ah hian Rajya Sabha elected member 233 leh nominated member 12 bakah Lok Sabha elected member 543 an awm. MP tinte hian an vote hlut lam a in ang vek a ni. Inthlan hi Parliament House-ah neih a ni ang.