SC-in Justice Karnan-a medical exam neihsak turin ti
Supreme Court chuan Calcutta High Court judge, Justice CS Karnan chu a rilru lam chian lohna a nei nia a lan avangin board of doctors-in medical exam an neihsak a ngai niin a sawi.
Jutsice Karnan hian Chief Justice of India leh Supreme Court judge pasarih-te chu nimina a hmaa inlan turin a lo ko tawh a ni. Hei bakah hian CJI leh judget pasarih-te hi an thubuai a fel hma chuan ram danga an zin lohna turin a ṭul anga hma la turin Air Control Authoritya a hriattir bawk.
Justice Karnan-a thupek siam hi Supreme Court zah lohna lian tak nia sawiin, Chief Justice of India JS Khehar kaihhruai judge pasarih awmna bench chuan a rilru lam enfiah turin medical exam neih a ngai niin a sawi.
Supreme Court bench chuan Justice Karnan-an an laka thupek a siam aṭang hian court rorel hna thawk chhunzawm tura a rintlak tawh loh zia a lang niin an sawi. Hei vang hian May 4-ah Kolkata-a Medical Boart of government doctor-te chu Justice Karnan hi enfiah turin a ti a, hemi atan hian West Bengal DGP pawh a ṭul anga police-te lo dah turin a ti bawk.
Court chuan Medical Board hnenah hian report chu May 8 aia tlai loah thehluh turin a ti. SC chuan February 8 hnu lama Justice Karnan-a thupek tihchhuahte chu ngaihtuah zui tlak lohah a ngai bawk. Karnan-a chungthu hi May 18 ah ngaihtuah a ni ang.
SC thupek tihchhuah anih hnuah Justice Karnan hian press conference koin, court thupek siam chu thil tihawm lo tak a nih thu a sawi. Supreme Court chu rilru lama harsatna a neih leh neih loh lo reltu tur a ni lo tih sawiin, a chungthu ngaihtuahtu judge parasih-te chu eiruknaa inhnamhnawih vek an nih thu a sawi. DGP chuan a thu hmu loa hma a la a nih chuan, a lakah thupek a siam tur thu a sawi bawk. Justice Karnan chuan Supreme Court judge pasarih-te chu judge eiru dangte humtuah a puh.