VIP culture hi EPI-ah thlak a ni dawn : PM
Prime Minister Narendra Modi chuan India rama VIP culture chu VIP awm lohna, mi tinte an pawimawhna ‘Every Person is Important’ (EPI) ah thlak a ni dawn tih a sawi.
PM hian Pathianni khan thla tin dana radio-a programme a hman ṭhin, Mann ki Baat programme-ah sorkar laipuiin VIP light a tihtawp chungchang a sawichhuak a, VIP chu EPI in thlak a ni tawh dawn a ni, a ti.
Sorkar laipui thupek ang hian nimin aṭang khan ram pumah VIP light chhit tihtawp a ni a, emergency motor-te chauhin an chhi thei tawh dawn a ni.
PM chuan ramchhung mipui, vaibelchhe 125-te chu pawimawhna leh hlutna in ang vek an nih thu a sawi a, VIP light chhit titawp tura thutlukna an siam hma chuan mipuiten VIP culture an lo ngaimawh zia a lo hre lo tih a sawi. Red beacon light chu VIP culture lantirtu atan hman niin, a hmangtu rilru-ah pawh thil diklo a tuh a ni, a ti. VIP ligth titawp tura thutlukna siamtu chu sorkar ni mah se, rilru-a VIP culture bet tlat tibo tur chuan theihtawp la chhuah zel a ngaih thu a sawi bawk.