Security pek belh loh vangin EC-in LS bypoll ṭhulh

Election Commission of India chuan Jammu and Kashmi-a Anantnag Lok Sabha bypoll neih tura duty tur pekbelh tura a ngenna chu sorkar laipuiin a remtihpui loh avang­in inthlan neih tur a ṭhulh.

EC chuan inthlan nia duty tura security force dah belh tura a ngenna chu Home Ministry hi an a theih loh thu a hrilh hnuin, venhim hna thawktu an tam tawk loh avangin inthlan hi kalpui chhunzawm chiah a ngai lo tih a sawi. Thawhṭanni zan zanlai khan Lok Sabha bypoll neih tur hi ṭhulh a nih thu a sawi.

Prime Minister Narendra Modi leh Home Minister Rajnath Singh-te chuan nimin tlai khan Jammu and Kashmir Governor NN Vohra hmuin, state chhung security dinhmunte an sawipui nghal a ni.

Bypoll neihna tur Anantnag hi Chief Minister Mehbooba Mufti bial a ni a, CM atana lakluh a nih tak avangin nikum khan Lok Sabha member a nihna aṭang hian a bang a ni. April 12 khan bypoll hi neih tura tih a ni a, mahse April 9-a Sringar Lok Sabha bypoll neihnaah tharum thawhna nasa tak chhuakin, mi pariat an thi a, hei vang hian inthlan hun tur sawn hlat a ni. May 25-ah inthlan hi neih tura sawn hlat a ni.

Election Commission chuan bypoll-a duty tur hian Home Ministry hnenah, paramilitary force company 740 chu May 12-ah dah turin a dil a, mahse home ministry hian company 300 vel bak a pek theih loh tur thu a hrilh. Hei vang hian EC chuan bypoll neih tur hi a ṭhulh ta a ni.

Home Ministry hnuaiah hian paramilitary force nuai 10 vel an awm a, mahse ministry chuan sipaite hi ramchhung hmun hrang hranga awm an ni a, hmanhmawh thilah EC-in a dil ang zat pawhkhawm hi a harsa dawnniin a sawi.

J&K-a BJP nena ṭangrual sorkar siam mektu, PDP chuan EC hnenah hian tualchhung boruak a him tawk loh avangin bypoll neih tur hi tiamchin awm loa sawn turin an lo nawr tawh bawk a ni.