Pakistan-in India sipai pahnih lu tansak

Pakistan sipaite chuan Thawṭanni khan Jammu and Kashmir-a Line of Control (LoC)-ah India sipai pahnih thatin, an lu an tansak.

Ramri vengtu Border Security Force (BSF) chuan Pakistan Border Action Team (BAT) hian sipaite hi lo ambush-in an that niin an sawi a, sipai an thahte hi Naib Subedar Paramjit Singh leh Border Security Force (BSF) jawan Prem Sagar-te an ni. BAT-ah hian sipai bakah firfiakte pawh an tel nia sawi a ni bawk.

BSF chuan Pakistan sipaite chet dan hi tum lawk sa niin an sawi a, a hma hian Indian post pali pawh an bei niin an sawi. Sipai an thahte hi patrol lai an ni a, Pakistan sipaite hian ramri-a inkahhai puan chu bawhchhiain hmun hrang hrang aṭangin an rawn kap niin an sawi. Sipaite hi himna zawngin an tlanchhia a, sipai pahnihte hi hnufualin, BAT team hian ramri aṭanga meter 200 vel rawn lutin an kaphlum a, an lu an tansak zui ta niin official chuan a tarlang.

Pakistan sipaite chetdanah India a lungawi lo hle a, military operation-a director general Lt Gen AK Bhatt chuan Pakistan sipai hotu hnenah sipai pa­hnihte lu tansak an ni chu thil tenawm leh nunrawn thlak tak a nih thu hrilhin, na taka chhan let an phu tih a sawi.

Hetih lai hian Pakistan army chuan a puhna hi a pha thung a, Pakistan army chu sipai zah kai tak, an hmelmate pawh ni se, sipaite zah lohna lantir ngai lo an nih thu a sawi.