India ramah Covid-19 kai enkawl dam 58% tling tawh

Covid-19 hripui lengin ziaawm lam pan hlei thei lo mah se enkawl dam pawh an pung ve zel a, nimin thleng khan hri kai enkawl dam rate chu 58.24% a ni tawh.

Ministry of Health and family Welfare report nimina tihchhuahah chuan hri kai enkawl dam 2,85,637 an awm tawh a, report tihchhuah hma darkar 24 chhungin mi 13,940 an enkawl dam tawh a ni.

Enkawl dam pung zel mah se hri kai hmuh chhuah thar erawh an la pung nasa hle tho a, MoHFW report tihchhuah hma darkar 24 chhungin hri kai hmuh chhuah thar 17,296 lai an awm leh a; hri kai hmuh chhuah thar tam ber ni a thleng leh a ni.

Hri kai hmuh chhuah tawh zawng zawng hi 4,90,401 an tling tawh a, hri kai mek 1,89,463 awmin 15,301-in an thihpui tawh. Covid-19 vanga thi mi 407 an awm belh leh bawk.

Indian Council of Medical Research (ICMR) chuan ni khatah sample  2,15,446 an test tih tarlangin nimin thleng khan sample 77,76,228 an test tawh. Testing facility tihchangtlun lamah pawh hma an sawn zel a, Covid-19 test theihna laboratory pawmpui 1,016 an nei tawh a, chung zinga 737 chu sorkar laboratory niin 279 chu private laboratory a ni thung.

ICMR chuan laboratory hrang hrang hnenah, sample an test zinga positive-te sample chu a rei lo berah ni 30 chhung vawng ṭha turin a hriattir. Sample endik tawhte a tihral danah pawh sorakrin kaihhruaina a siamte zawm tur leh, record vawng ṭha vek turin a hriattir. 

India rama hri lengin a nghawng nasat ber state Maharashtra-ah chuan hri kai 1,47,741 an awm tawh a, nimin khan hmuh chhuah thar 4,841 lai an awm leh a ni. Enkawl dam 77,453 lai an awm tawh bawk a, hri kai mek 63,357 awmin mi 6,931-in an thihpui tawh.

Delhi pawh an dinhmun a chhe zual zel a, hri kai hmuh chhuah thar 3,390 lai awm lehin mi 73,780-in hri an kai tawh a ni. Heng zingah 44,765 chu enkawl dam tawh niin 26,586 chuan an la vei mek a, mi 2,429-in an thihpui tawh a ni.

Tamil Nadu-ah chuan hri kai 70,977 an awm tawh a, heng zinga 39,999 lai chu enkawl dam tawh niin 30,067 chuan an la vei mek a ni. Mi 911-in an thihpui tawh bawk.

Prime minister Narendra Modi chuan Covid-19 vaccine siam chhuah a la nih loh avangin, hri laka invenna turin mipuite chu midang hlata awm (social distancing) leh face mask ngai pawimawh chhunzawm zel turin a ngen a ni. 

Nimina 'Atma Nirbhar Uttar Pradesh Rojgar Abhiyan' a hawnnaah, Modi chuan hripui leng hian mi zawng zawng a nghawng a, mitinten harsatna an tawk mek a, he hri laka fihlim hun tur hi hriat a la ni lo, a ti. Hei vang hian fimkhur taka awm a, face mask vuah leh social distancing hman zel chu a ngai a ni, tiin a sawi.