Pakistan sipaiten Makote sector-a Indian post kap leh Sorkar lapuiin Pakistan High Commissioner ko
Pakistan sipaite chuan nimin zing khan Jammu and Kashmir-a Mankote sector-a Indian post an kap leh. Thawhṭanni khan Pakistan sipaite hian India sipai pahnih te chu kap hlumin an lu an lo tansak tawh a ni.
Zing dar 1.30 velah Pakistan sipaite hian Indian post hi an kap a, India sipaite nen darkar nga vel an inkap zui a ni.
Pakistan chuan India sipai pahnih ambush a, rawng taka thah an nihnaah an sipaite an inhnamhnawih tello niin a sawi thung a, an puhna finfiahna rintlak pe turin a phut. India chuan hei hi a pawm lo a, sipaite thah leh an ruang rawng taka sawisak an nih avang hian na taka a chhanlet tur thu a sawi.
Thawhlehni zan khan Kashmir Valley-a Shopian district-a court complex chu helhoin luhkhungin, police duty mi panga-te silai an laksak bawk a ni.
India sipai pahnihte rawng taka thah a nih chungchangah nimin khan sorkar laipui chuan New Delhi-a Pakistan High Comissioner Abdul Basit chu koin, a lungawi loh thu a thlen. Pakistan palai hi foreign secretary S Jaishankar chuan koin, May 1, 2017-a Pakistan sipaiten rawng taka India sipai pahnih thah an nih chungchanga India thinrimna leh lungawi loh thute a lo hrilh a ni.
Pakistan palai hi Pakistan sipaiten ramri kanin India ram chin an rawn lut ngei tih finfiahna blood sample pawh neih a nih thu hrilh a ni a, ramri kana India sipaite beihnaa mawhphurtu commander leh sipaite chunga action lak ngei an phut tih hrilh a ni bawk.