August 12 thleng Rel la chawlh tir dawn

Covid-19 vangin dan pangngaia rel service chu titawp lailawk a ni a, ram chhunga khualzin phur ṭhin rel chu August 12 thleng titawp chhunzawm a la ni dawn tih Indian Railways chuan nimin khan a tarlang. 

A hmaa thuchhuah a siamah, Railway chuan rel service tihtawp hun hi June 30 thleng atan a ti a, mahse ramchhunga hripui lengin ziaawm lam a la pan theih loh avangin service tihtawp hun hi a pawtsei leh a ni. Khualzin phur rel service hi hri leng vangin March 22 aṭang khan tihtawp an ni tawh a ni.  Hetih lai hian special train, mail express 200 leh Rajdhani train 30 chu May 12 aṭang khan tlantir an ni thung. 

Khualzin phur rel service tihtawp hun pawhsei a la nih leh avang hian July 1 aṭanga August 12 a ticket lo book tawh te chu an ticket man pumpui pek kir leh tur an ni a, online hmanga ticket book-te pawh an account-ah thun sak leh vek an ni ang. Booking tih theih leh hun tur chu hriattir leh an ni leh dawn a ni. 

Central leh Western railway zone-a tlan special train, Shramik Special train leh suburban train erawh chu tlan chhunzawm tir an ni ang.