UP CM hlui thlalak chuanna school bag sem

Uttar Pradesh Chief Minister hlui, Akhilesh Yadav-a kaihhruai sorkarin thuneihna an chan laia school bag sem tura a lo order tawh chu sorkar thar chuan a sem chhuak ṭan a, heng school bag-ah hian CM hlui Yadav-a thlalak a chuang a ni.

Sorkar hmasa hian nikum December thla khan school bag vaibelchhe 1.8 a lo order tawh a ni. Heng school bag-te hi Chief Minister Yogi Adityanath-a kaihhruai sorkar thar chuan ruahman lawk a nih angin sem a tum tih a sawi.

Nikum October thla khan Yadav-a kaihhruai sorkar chuan state chhunga primary school naupangte hnenah staineless steel plate leh no-te a lo sem tawh bawk a, hengah pawh hian Akhilesh Yadav-a thlalak chuantir vek a ni.

January thla khan assembly inthlan neih tur avanga model code of conduct puan a nih tak vangin school bag-te hi sem loha dah a ni a, Yadav-a kaihhruai Samajwadi Party chu chak loin BJP sorkar thar a ding zui a ni. Sorkar thar a din hnuah sorkar thuchhuah nghakin bag order sa-te hi district education office hrang hrangah dah a ni. Mahse Yogi-a kaihhruai sorkar chuan sem tura a tih tak avangin semchhuah ṭan a ni.

UP sorkar chuan mimal hming chawiin eng scheme mah an siam dawn lo tih an sawi a, bag-a CM hlui thlalak chuanna te chu sem zawh a nih huna a thar siam turah chuan ‘Mukhya Mantri Yojana’ emaw ‘Uttar Pradesh Yojana’ tih ziah a nih tawh thung ang.

BJP sorkar hian sorkar hmain government scheme tam takah Samajwadi tih hming an chawitir chu an paihbo tawh bawk a, heng zingah hian Samajwadi Smartphone scheme, Samajwadi Namak (fortified salt) scheme te pawha tel. Zirlai naupangte hnena stainless steel plate sema Akhilesh Yadav-a sticker dah pawh a tihtawp bawk. Sorkar hmasa hian kum 2012 khan Samajwadi laptop a lo sem tawh bawk a, heng laptop-ah hian screen saver atan Akhilesh Yadav leh a pa Mulayam Yadav-a te thlalak hman a ni. An thlalak lanna laptop hi nuai 18 sem a ni.