'Kali' chungchang a sawi dan avangin BJP-in TMC MP Mahua Moitra lakah FIR thehlut

BJP hruaitu Jiten Chatterjee chuan Trinamool Congress MP Mahua Moitra-i'n goddess Kali chungchang a sawidan chuan midang rilru a ti na nia sawiin, a lakah FIR a thehlut.

Mahua Moitra chuan nimin khan a twitter-ah a laka FIR thehluh chuan a ti hlau lo tih sawiin, amah demna turin a thusawi hi an her danglam niin a puh let. "BJP chu rawn che zel teh se! Kei ngei pawh hi Kali betu ka ni a, engmah ka hlau lo. Thil hrechiang tawk loa in tih dan hi ka hlau lo a, in misualte leh in police-te pawh ka hlau lo. A bikin mi in 'troll' na hi ka hlau lo. Thudik tak hian beihpuitu a neih kher a ngai lo," tiin a sawi.

Mahua hian a hma pawhin filmmaker Leena Manikemkalai-in film poster a tihchhuah sawizui hlawh tak, goddess-in mei a zui lai thlalak chungchanga a thusawi chu amah tihchhiat tumtute chuan an her danglam sak tih a lo sawi tawh a ni.

TMC MP hian Kolkata-a India Today conclave-a thu a sawiah, mitinin an pathian biak dan turah an duh dan anga be turin dikna an neih thu a sawi a, Bhutan leh Sikkim-ah chuan puja an tihin an pathian chu whisky an pe a, mahse Uttar Pradesh-ah erawh chuan whisky pe se sakhaw sawichhiatna nasa tak angah a ni thung ang, a ti. "Kei chuan goddess Kali hi sa ei leh zu pawh pawm thei pathiannu ah kan ngai a ni. Hinduism chhungah, Kali betu zingah, Kali nihna hi duh dan anga ngai thei turin dikna ka nei a, hei hi ka zalenna a ni," a ti. He a thusawi hi BJP chuan thehdarhin, Hindu pathian sawichhiaah an puh zui a ni.