Nupur Sharma lu tansaktu hnena lawmman tiamtu Ajmer dargah cleric Salman Chisti man a ni

Rajasthan police-te chuan prophet Muhammad chungchang mawi lo taka sawitu, BJP spokesperson hlui Nupur Sharma lu tansaktu hnena lawmman atana a in pek tiamtu, Ajmer dargah cleric chu Thawhlehni zan khan an man tih an sawi.

Video thehdarhah Ajmer dargah cleric, Salman Chisti hian Nupur Sharma lu tansaka a hnena petu hnenah a chenna in chu a lo pek tur thu a puang a, hei bakah hian amah ngeiin prophet Muhammad a sawichhiat avangin kahhlum a tum thu pawh a sawi bawk. A thusawi avang hian Thawhṭanni zan khan police-te chuan a lakah FIR an lo ziaklut tawh a ni.

Kar liam ta khan Rajasthan-a Ajmer dargah main gate-a sakhaw lama inhuatna chawk tho thei zawnga thu sawitu mi pali chu police-ten an lo man tawh bawk.

Police-te chuan cleric an man, Slaman Chisti hian criminal record pawh a nei tawh tih an sawi. Additional SP Vikad Sangwan chuan video hi an chhuichiannaah, Chisti hian rui chungin he video hi a siam thu a sawi a, thu pawh zawhfiah mek a ni, a ti. Video a siam laiin Chisti hi a rilru a fim ṭha lo hle a, rilru chiang vak lo leh zu ngawlvei a nih thu a sawi.

Nupur Sharma thusawi a thlawp thu social media lama ziaktu, Udaipur-a Hindu mi pakhat chu mi pahnihin beiin a lu an lo tansak a, tualthattute hi police-te chuan an man tawh a ni. He tualthahna kaihhnawihah hian mi dang panga pawh man a ni tawh bawk a, he thil thleng hi National Investigation Agency (NIA) in a chhui mek a ni.