Vande Bharat Mission hnuaiah India mi nuai 3.6 hruai haw an ni tawh

Ministry of External Affairs chuan hripui leng vanga ram danga India mi awmte hruai hawna tura May 7 aṭanga a kalpui, Vande Bharat Misison  hnuaiah India mi nuai 3.6  chuang hruai haw an ni tawh tih a sawi. 

MEA thupuangtu Anurag Srivastava chuan India rama haw duh in register hi mi 5,13,047 an awm tih a sawi a, heng zinga  3,64,209 chu thlawhtheihna hmangin hruai haw an ni tawh a ni, a ti. India ṭhenawm, Nepal, Bhutan leh Bangladesh aṭangin motor hmangin mi 84,000 chuang hruai haw an ni tawh tih a sawi bawk. 

Vande Bharat Mission hi a thawh thumna kalpui mek a ni a, khawmualpui panga ram 50 chuangah thlawhtheihna ṭum 875 tirh a ni tawh a,  heng zinga 700 chuang chu India ramah an rawn kir tawh a, a dangte pawh an rawn thlen thuai beisei a ni, a ti. A thawh lina hi July 3 aṭangin kalpui a ni dawn a, India mi la awm tam zualna ramah thlawhtheihna hi tirh leh an ni ang. 

Ram danga India mi awmte hruai hawna tur hian thlawhtheihna leh motor bakah, Navy lawng liante pawh hman a ni bawk a ni. 

June 24 khan Iran-a India mi awmte hruai hawna turin INS Jalashwa lawng lian tir a ni.