Mipuite aia bawng thlang zawkah BJP puh

Central-a BJP thawhpui Shiv Sena chuan, Prime Minister Narendra Modi-a kaihhruai sorkar chu Pakistan BAT-in India sipai pahnih lu an tansak chungchanga a chhanlet danah sorkar laktlak loh niin a puh.

Shiv Sena hotu Uddhav Thacke­ray chuan BJP sorkarin bawng chungchang a buaipui lutuk chu bei letin, bawng chhanhim aiin ram chhanhim chu a pawimawh zawk a ni, a ti. BJP chuan ram tihchakna lam ngaihtuah lo a, an party tihchak dan tur chauh buaipuiah a puh bawk.

Udhhav Thackeray hian tunhnaiah Shiv Sena office bearer, corporator, legislator leh party minister-te chu meeting a neihpui fo a, BJP hi vawi tam tak a lo sawisel tawh a ni. Shiv Sena hotu chuan BJP chu a rang thei ang bera mid-term poll buatsaih turin a cho bawk.

Thackeray chuan BJP chuan mid-term poll sawirik a nih chuan party dangten an lo hlauthawng turah an ngai a, mahse an party chuan an hlau ve lo tih a sawi.

Prime Minister Narendra Modi chu Pakistan lakah zirtirna pe turin a phut tih Thackeray chuan a sawi. "Pakistan hian surgical strike vawi khat ringawt aṭang khan engmah a zir chhuak lo. Pakistan ram inluhchilh a, inṭhendarh vek angai a ni, Shiv Sena chuan a thlawp zel ang che" tiin a sawi.