Justice Karnan-a'n medical test nei duh lo

Calcutta High Court judge Justice CS Karnan chuan Supreme Court bench-in medical test nei tura a hriattirna chu a zawm duh lo.

Justice KS Karnan hian February thla khan Supreme Court leh High Court judge ṭanglai zinga eiruknaa inhnamhnawiha a puh mi 20 hming chu a lo puang tawh a, Indian judiciary-a eirukna nasa tak thleng mek tihtawp a nih theih nan heng judge-te hi chhuichian a phut bawk. Hemi hnu hian Chief Justice of India leh Supreme Court judge pasarih-te chu a hmaa inlan turin a ko a, an thubuai a fel hma chuan ram danga an zin chhuah lohna tura a ṭul anga hma la turin Air Control Authority a hriattir bawk.

Karnan-a thupek siam hi Supreme Court zah lohna lian tak niin May 1 khan judge pasarih awmna Supreme Court bench chuan a rilru lam enfiah a ngai a ni tiin thupek a tichhuak. Bench chuan doctor-te chu Karnan-a rilru lam dinhmun hi May 4-a enfiah sak a, May 8-ah court-ah report thehlut turin a hriattir a ni.

Nimin kha medical test a neih hun tur ni mah se, Justice Karnan hian amah endik turin doctor-te chu phalna a pe duh lo a, judge pasarih awmna bench thupek tihchhuah chu dan ang taka tihchhuah a ni lo niin a sawi. Eirukna doa a hmalakna chu a kalpui chhunzawm zel tur thu a sawi bawk.