External Affairs Minister Jaishankar leh China foreign minister inkawm

External affairs minister S Jaishankar leh China foreign minister Wang Y-te chuan nimin khan Bali, Indonesia-ah meeting an nei.

Meeting hi darkar khat chhung vel an nei a, Ladakh khawchhak lama India-China ramria ram pahnihten buaina an neih chungchang te, China rama Indian zirlai awmte India rama hruai haw dan tur leh, ram pahnih inkara direct-flight thlawh tir leh chungchangte an sawidun. Hruaitu pahnihte hian G20 foreign minister-ten Bali-a meeting a neih kar lakah inkawmna hi an nei a ni.

Ladakh khawchhak lama ramri-ah ram pahnih sipaite hi an lo intibuai tawh a, tun thlengin sipaite inkar hi a la ṭha hlei thei lo. Buaina chinfel dan ngaihtuahin ram pahnih sipai aiawhte hi ṭum eng emaw zat an inbe tawh bawk a, mahse tun thlengin inremna an la siam thei lo. Ramri, Line of Actual Control (LAC)-ah hian ram pahnihte hian sipai 50,000 - 60,000 vel ve ve an la dah reng bawk.

India chuan Ladakh khawchhak lama friction point aṭangin China sipaite chu lachhuak turin a phut a, ram pahnihten inzawmna an neihte tihhmasawnna turin ramri lamah boruak ṭha tak an neih a ngai a ni, a ti.

Jaishankar chuan China-a India zirlai awmte chungchang pawh an sawidun tih a sawi. China rama India mi zirlai awm tam tak chu kum hnih chhung Covid-19 hri leng vanga khuahkhirhna siam vangin an haw thei lo. India sorkar pawhin zirlaite dinhmun hi China thuneitute pawh a lo sawipui fo tawh. Hir leng vanga ram pahnih inkara direct-flight tihtawp tak chu service chhunzawm tir dan turte pawh an sawidun bawk a ni.