Rahul Gandhi thusawi dik lo taka tichhuaktu Zee News anchor bail-a chhuah a ni

Congress party hruaitu, Rahul Gandhi thusawi chungchang dik lo taka TV news programme-a tichhuaktu, Zee News anchor Rohit Ranjan chu bail-a chhuah tir a ni.

Ranjan hian TV-a news dik lo tihchhuah avanga a laka thubuai eng emaw zat ziahluh chungchang chu a rang thei ang bera ngaihtuah tura ngenin Supreme Court-ah petition a thehlut a, mahse petition an thehluh hi official-a chhinchhiah zingah a lo la tel loh avangin court chuan a ngaihtuah thei rih lo.

Nilaini khan Ranjan hi Noida police-ten an man a, mahse bail-a chhuah leh nghal a ni. "A show pakhatah news dik lo a tihchhuah avangin a lakah FIR eng emaw zat thehluh a ni a, tunah hian Chattisgarh police pawhin man an tum reng a ni. Hei vang hian a chungthu hi ngaihtuah a nih thuai loh chuan, police hrang hrang kutah a awm kual reng dawn a ni," tiin a ukil chuan nimin khan Court-ah a ngen.

Zee News-ah hian Rahul Gandhi-a'n Wayanad, Kerala-a a office suasamtu chu naupang mai an ni a, ngaihdam an ngai a ni tia a sawi chu, tun hnaia Udaipur-a Hindu mi pakhat thattute chungchang a sawina anga lantirin tihchhuah a ni. He thil thleng avang hian news channel chuan thupha an chawi tawh a, mahse Gandhi hian sawisel leh beih pawh a tawh phah nasa hman hle. Congress party chuan Gandhi thusawi dik tawk lo taka tichhuaktu, Rajan lakah hian FIR eng emaw zat an thehlut a ni.